گائیڈ · گوگل میپس

گوگل لسٹنگ معطل ہو گئی؟ قدم بہ قدم کیا کریں۔

جب گوگل کو لگے کہ کوئی بزنس پروفائل اس کے اصول توڑ رہی ہے تو وہ اسے معطل کر دیتا ہے۔ ہو سکتا ہے گاہک آپ کو میپس پر نہ ڈھونڈ پائیں، اور بحال ہونے تک آپ لسٹنگ نہیں چلا سکتے۔ زیادہ تر معطلی کے خلاف صحیح کاغذات کے ساتھ اپیل ہو سکتی ہے۔ نئی لسٹنگ بنانا یا جلدبازی کی اپیل عموماً معاملہ اور بگاڑ دیتی ہے۔

لسٹنگ معطل کیوں ہوتی ہے

اپیل ٹول وجہ بھی دکھاتا ہے اور اس اصول کا لنک بھی جو ٹوٹا، اس لیے وہیں سے شروع کریں۔ گوگل کی اپنی گائیڈ لائنز میں عام وجوہات یہ ہیں:

• نام میں اضافی الفاظ۔ بورڈ والے نام کی جگہ "لاہور کی بہترین بریانی"۔
• ایسا پتہ جہاں آپ کام نہیں کرتے۔ کرائے کا ڈاک کا پتہ یا ورچوئل آفس، یا پی او باکس، ان کی لسٹنگ نہیں بن سکتی۔
• گھر کا پتہ جو چھپانا چاہیے تھا۔ جو کاروبار گاہک کے پاس جاتا ہے (کیٹرر، ڈیکوریٹر، الیکٹریشن) وہ پتہ چھپا کر سروس ایریا لکھتا ہے۔
• ایک ہی کاروبار کی ایک سے زیادہ لسٹنگ۔
• پتے کی لائنوں میں کی ورڈ یا لنک۔
• خریدے ہوئے یا جعلی ریویو۔

اپیل، قدم بہ قدم

اپیل سے پہلے یقین کر لیں کہ لسٹنگ گوگل کی گائیڈ لائنز کے مطابق ہے، جیسا گوگل خود کہتا ہے۔ پھر گوگل کا بزنس پروفائل اپیل ٹول استعمال کریں:

1. پہلے کاغذات تیار رکھیں۔ فہرست نیچے ہے۔ ثبوت والا فارم کھلنے کے بعد اسے 60 منٹ میں جمع کرنا ہوتا ہے، ورنہ وہ اپیل کے ساتھ نہیں لگتا۔
2. اپیل ٹول کھولیں۔ اس گوگل اکاؤنٹ سے لاگ اِن کریں جس کی لسٹنگ ہے۔
3. لسٹنگ چنیں۔ ٹول پابندی، اس کی وجہ اور اصول کا لنک دکھاتا ہے۔
4. Submit Appeal دبائیں۔ پھر Add evidence دبا کر اپنے کاغذات اپ لوڈ کریں۔
5. گوگل کی ای میل کا انتظار کریں۔ گوگل کے مطابق فیصلے میں پانچ کام کے دن تک لگ سکتے ہیں۔ جواب آنے سے پہلے اسی بات پر دوسری اپیل نہ بھیجیں۔
6. انکار ہو جائے تو ایک بار مزید جائزہ مانگیں۔ اس میں وہ ثبوت لگا سکتے ہیں جو پہلی بار نہیں بھیجا تھا۔

اگر گوگل نے صرف لسٹنگ نہیں بلکہ آپ کا پورا گوگل اکاؤنٹ محدود کیا ہے، تو پہلے اس کی اپیل "My accounts" والے صفحے سے ہوتی ہے، پھر لسٹنگ کی۔

کون سے کاغذات کام آتے ہیں

گوگل یہ بتاتا ہے: کاروبار کی سرکاری رجسٹریشن، کاروباری لائسنس، ٹیکس سرٹیفکیٹ، اور کاروبار کے یوٹیلیٹی بل: بجلی، فون، پانی، انٹرنیٹ۔ پاکستان میں یہ آپ کا رجسٹریشن سرٹیفکیٹ، ایف بی آر کا این ٹی این سرٹیفکیٹ، ٹریڈ لائسنس، یا دکان کا بجلی یا پی ٹی سی ایل کا بل ہو سکتا ہے۔ ہر کاغذ پر نام اور پتہ لسٹنگ والا ہی ہونا چاہیے۔

یہ کبھی نہ کریں

• اپیل کے جائزے کے دوران نئی لسٹنگ نہ بنائیں۔ گوگل یہ صاف لفظوں میں کہتا ہے۔
• ایک ہی بات پر بار بار اپیل نہ بھیجیں۔
• جو "معطلی ختم" کروانے کا وعدہ کرے، اسے پیسے نہ دیں۔ فیصلہ صرف گوگل کرتا ہے، اسی ٹول سے جو آپ خود استعمال کر سکتے ہیں۔

بحال ہونے کے بعد اسے صاف رکھیں: باقی سب گوگل میپس کی چیک لسٹ میں ہے۔ اگر یہ کام کسی کے حوالے کرنا ہو تو گوگل لسٹنگ کی سروس Rs 3,000 سے ہے۔

گوگل کے اپنے ہیلپ پیج: معطل یا بند پروفائل، اپیل، کاروبار دکھانے کی گائیڈ لائنز۔

آخری بار دیکھا گیا: 27 ستمبر 2026 · تمام گائیڈز