شرائط

ساتھ کام کرنے کا طریقہ، سیدھے الفاظ میں۔

چھوٹے کاروبار کے لیے چھوٹی ویب سائٹ کی سادہ شرائط۔

آخری تبدیلی: 23 اکتوبر 2026

آپ کا واسطہ کس سے ہے

Sitey ایک آدمی کی ویب ڈیزائن سروس ہے، جو اسلام آباد سے آفاق رشید چلاتے ہیں۔ یہ رجسٹرڈ کمپنی نہیں ہے۔ ہر بات اور ہر کام واٹس ایپ پر 0326 3974343 پر طے ہوتا ہے۔

کام شروع ہونے سے پہلے کیا طے ہوتا ہے

• آپ کو ایک قیمت لکھ کر ملتی ہے — بنانے کا خرچ اور ماہانہ، دونوں۔
• پیسے دینے سے پہلے آپ اصل، چلتی ہوئی سائٹ دیکھتے ہیں — اس کی تصویر نہیں۔
• پسند نہ آئے تو پیسے نہیں دینے، اور سائٹ کبھی لائیو نہیں ہوتی۔ دیکھنے کی کوئی فیس نہیں۔

ماہانہ کس چیز کا ہے

• ہوسٹنگ، پتہ، اور سائٹ کا چلتے رہنا۔
• جو چھوٹی تبدیلیاں آپ ہمیں دیں — ریٹ، تصویریں، اوقات، نئے آئٹم — ہر بار الگ بل کے بغیر۔
• گوگل والے پلان میں: پوسٹس، ریویوز کے جواب، تصاویر، اوقات، اور ہر مہینے آپ کی لسٹنگ کے گوگل کے اپنے نمبروں کی رپورٹ۔
• ماہانہ کوئی قسط نہیں ہے۔ بند کریں گے تو سروس بند ہوگی، قرض نہیں رہے گا۔

اگر آپ ادائیگی بند کر دیں

• کچھ بھی روکا نہیں جاتا۔ کہیں، اور ایک ہفتے کے اندر آپ کو ایک زپ فائل ملتی ہے جس میں: ہر تصویر پوری سائز میں جیسے آپ نے بھیجی تھی؛ آپ کا مینو، ریٹ اور لکھائی ایکسل اور JSON میں؛ اور سائٹ کی سادہ HTML نقل — صفحے، اسٹائل شیٹ اور تصویریں، جو فولڈر سے براؤزر میں کھلتی ہیں اور کوئی بھی ڈویلپر کسی بھی ہوسٹنگ پر لگا سکتا ہے۔ اس میں Next.js کا سورس اور ایڈمن شامل نہیں۔
• سائٹ پرانی حالت میں چھوڑنے کے بجائے آف لائن کر دی جاتی ہے۔ پچھلے سال کے ریٹ والی سائٹ کاروبار کا فائدہ نہیں، نقصان کرتی ہے۔
• اگر .pk ڈومین آپ کا اپنا ہے تو وہ آپ کا رہتا ہے اور جہاں کہیں آپ کہیں وہاں لگ جاتا ہے۔ مفت والا yourname.sitey.pk پتہ ساتھ نہیں جاتا — وہ Sitey کے ڈومین کا حصہ ہے۔
• بعد میں واپس آنا ہو تو سائٹ دوبارہ لگ سکتی ہے۔ کم از کم نوے دن تک کچھ نہیں مٹایا جاتا۔
• اگر Sitey کبھی کام بند کرے تو آپ کو آپ کا مواد اور سائٹ کی سادہ نقل، اور مناسب وقت سے پہلے اطلاع ملتی ہے۔ ایک آدمی کا کاروبار ایمانداری سے اتنا ہی وعدہ کر سکتا ہے۔

اگر Sitey آپ کی گوگل لسٹنگ چلائے

• آپ اپنی گوگل بزنس پروفائل پر Sitey کو مینیجر بناتے ہیں۔ مالک آپ ہی رہتے ہیں اور یہ رسائی آپ خود، کسی بھی وقت، بغیر پوچھے ختم کر سکتے ہیں۔
• پوسٹس، جواب اور تصاویر آپ کے نام سے لگتی ہیں۔ کچھ بھی گھڑا نہیں جاتا: نہ جھوٹے ریویوز، نہ ایسی آفر جس پر آپ نے ہاں نہ کہی ہو، نہ ایسی تصویریں جو آپ کی نہ ہوں۔
• نازک بات — کسی ناراض ریویو کا جواب، یا اوقات ہمیشہ کے لیے بدلنا — پہلے آپ سے پوچھی جاتی ہے۔

آپ کا مواد آپ ہی کا رہتا ہے

• آپ کی تصویریں، مینو، ریٹ اور کاروبار کا نام مکمل طور پر آپ کے رہتے ہیں۔
• یہ صرف آپ کی سائٹ بنانے اور چلانے کے لیے استعمال ہوتے ہیں، اور کسی کام کے لیے نہیں۔ نہ بیچے جاتے ہیں، نہ کسی کو دیے جاتے ہیں، نہ کسی چیز کو سکھانے کے لیے استعمال ہوتے ہیں۔
• آپ کی سائٹ کام کے نمونے کے طور پر دکھائی جا سکتی ہے۔ نہ چاہیں تو کہہ دیں، ہٹا دی جائے گی۔

بیک اپ، اور اگر کچھ خراب ہو جائے

• آپ کا مینو، ریٹ اور لکھائی ہر رات کاپی ہوتے ہیں، اور ہر کاپی تیس دن رکھی جاتی ہے، سائٹ سے الگ جگہ پر۔
• کوئی چیز غلطی سے مٹ جائے تو بتائیں، پچھلی رات کی کاپی سے واپس آ جاتی ہے۔
• آپ کی تصویریں سائٹ سے الگ رکھی جاتی ہیں، اس لیے کوئی صفحہ بدلنے یا ہٹانے سے وہ نہیں مٹتیں۔
• سائٹ کلاؤڈ فلیئر اور Supabase پر چلتی ہے۔ دونوں بھروسے کے قابل ہیں، دونوں Sitey کے نہیں ہیں، اور کسی کے بارے میں یہ وعدہ نہیں ہو سکتا کہ کبھی بند نہیں ہوں گے۔
• آپ کی سائٹ خراب ہو تو واٹس ایپ پر بتائیں، ٹھیک کر دی جاتی ہے۔ جو چیز خراب دی گئی ہو اسے ٹھیک کرنے کا کوئی پیسہ نہیں۔

تبدیلیاں، اور کتنی جلدی

• ریٹ، آئٹم اور تصویریں آپ خود اپنے فون سے، جتنی بار چاہیں، بدل سکتے ہیں۔
• جو تبدیلیاں آپ ہمیں دیں وہ عام طور پر اُسی دن ہو جاتی ہیں۔ یہ عام تجربہ ہے، طے شدہ وعدہ نہیں — ایک آدمی ایمانداری سے چوبیس گھنٹے کی ضمانت نہیں دے سکتا۔

ذمہ داری

• Sitey کی ذمہ داری اُتنی ہی ہے جتنا آپ نے سائٹ کے لیے دیا۔ یہ ایک چھوٹی ویب سائٹ ہے، آپ کے کاروبار کا بیمہ نہیں۔

پرائیویسی

• آپ کی سائٹ پر اشتہار کی کوئی کوکی نہیں لگتی اور کسی تیسرے فریق کا ٹریکر نہیں چلتا۔
• وزٹ کوکی کے بغیر گنے جاتے ہیں: ایک وزٹر یعنی IP، براؤزر اور دن کا ایک طرفہ ہیش، جسے واپس کسی شخص تک نہیں پہنچایا جا سکتا اور نہ دنوں کو جوڑا جا سکتا ہے۔
• ریکارڈ صرف یہ ہوتا ہے کہ کون سے صفحے کھلے اور کسی نے واٹس ایپ، کال یا راستے پر دبایا یا نہیں۔ یہ اس لیے ہے کہ آپ دیکھ سکیں کہ سائٹ سے کام آ رہا ہے یا نہیں۔
• جب گاہک واٹس ایپ دباتا ہے تو بات آپ کے اور اُس کے درمیان ہوتی ہے۔ Sitey اسے نہیں دیکھتا۔

sitey.pk کی تصویریں

• مفت ٹولز اور میڈیا کے صفحات پر دکھائے گئے نمونے کے ڈیزائن اور تصویریں Sitey نے بنائی ہیں۔
• آپ انہیں کریڈٹ کے ساتھ شیئر کر سکتے ہیں: Sitey (sitey.pk) لکھیں اور جس صفحے سے تصویر لی ہے اس کا لنک دیں۔
• کسی اور استعمال کے لیے، مثلاً چھاپنا، بیچنا یا اپنے کام کے طور پر لگانا، پہلے واٹس ایپ (0326 3974343) یا hello@sitey.pk پر پوچھ لیں۔